صوت الصورة
صورة العدد
إعداد - بكر هذال
ياللي على الموتر نويت السباحه
وأخذت لك مسبح كبيرن ومنفوخ
معذور دام الحر مشهر إسلاحه
عزالله إنك يا ابن الأجواد مطنوخ
طفلين دوم نفوسهم حيل مرتاحه
والكل منهم صار من الحر مصلوخ
خالد بن ناصر المخيمر – روضة سدير
قيض الجزيره حدكم للسباحه
مسبح صغير توكم مشترينه
ليتك قضيت الصيف في جو باحه
والا الجنوب اليوم ومطورينه
عبدالمحسن بن محمد المحيسن
رياض الخبراء
حملي كبير وسايقي صار مطفوق
لا عدت لفّه عكرها على طول
ذي حالتي يا خوان من فتحة السوق
ومن كثرة المسكات رزي غدا فول
عبدالكريم النغيمشي – الربيعية
قلنا لبونا نريد نروح للطايف
نبي براد الشفا وأسبوع فالباحه
قال المصايف غلاها زايد وكايف
والنفس ما هي من المشوار مرتاحه
لكن يا عيال انا في حلها شايف
اشري لكم مسبحٍ منفوخٍ جناحه
، صورة العدد السابق
سعود سعد العتيبي – الرياض
هذا فرح ولا ترح ولا تهور وانتحار
هذا خطأ فعلك ترى ما يمكن يصير
مسبح خفيف ومنظر يخيف ودمار
طفلٍ صغير وترى هذا فعلٍ خطير
محمد بن عبدالعزيز الخنيفر - أشيقر
اصبر وتاصل بالسلامه على خير
ترى العجل منتوذ يا طيب الفال
حطيت مسبح فوق ونيت صغير
وليتك تنبه تربط الحمل بحبال
حمد عبدالله الوايلي - حوطة سدير
طوق النجاه بحوض تايوتا وطفلين
ومن خلفهم بان إلنا رأس نخله
يوم الحراره قابرت حد خمسين
الحر نرجو عسى يلطف لعله
سعود عائش الحربي - جدة
شم السوامق غايتي وأمنياتي
وصحيح مسلم والإمام البخاري
أزرع ولا أقطع وهذي سواتي
غرس البواسق مهنتي وافتخاري
من صغر سني والزراعة حياتي
والنخلة والسيفين تعني شعاري
على آل زولان الفيفي - بيشة
مسبح على الهلّي وفي وسطه أطفال
وفي ظرف لحظة يسقط الطفل يا أخوان
وعلى ولي الأمر يترك هالإهمال
هذا فعل مرفوض ونقول غلطان
ريان محمد الخنيفر - الرياض
مسبح كبيرٍ فوق سيارة صغيره
والولد فرحان بسرعة يبي البيت
لن الحرارة فعلن كبيره .. كبيره
يا عسى ينقص فوحها ليت .. ياليت
بشائر القحطاني - الرياض
الجمعة أغسطس 03, 2012 10:56 pm
